للشَوق يا بنتي ألف سرداب

للشَوق يا بنتي ألف سرداب
بعدو القدر ما قدر يجتاحو
لَفّو المدى بِ غَيمة السّرساب
وأيلول كابس عالغَيم راحو
وشو بعد بدّو ينفعك العتاب
ما دامهن باعوا الوَفى و راحوا
خلّوا بيوت مهَجَّره وبواب
وكَرم نشَلَع قلبو عَ فَلّاحو
...فَيّة عَريشي فارَقِت أحباب
ياما  لِها أسرارهن باحوا
نقطة عَرَق ع جَبهة الحَطّاب
جندي سهر عَ صَحوة سلاحو
ودْراج برداني أملها خاب
وزهور ياما بعطرهن فاحوا
خَلّوا خَطاويهن على العْتاب
والباب عميبكي عَ مفتاحو
جَن المَوج عَ غيبة الأحباب
.....جاع البحر لَ شباك مَلّاحو
راحوا بلا ما يشرَحوا الأسباب
خلّوا الوَطَن عمتنزف جراحو
والشَّوق بعدو بغيمة السّرساب
وأيلول كابس عَ الغيم راحو

آمال ابو فارس المربية الاديبة والشاعرة, المسؤولة عن زاوية المنتدى الثقافي. يمكنكم الاتصال بها  Amlabo@walla.com او على هاتف 0549026108