إبر ودبابيس – دعسة
• قدّمت الأمم المتحدة هذا الأسبوع مسرحيتها السنوية بعرض لزعامات العالم..
• ظهر الزعماء واحد ورا الثاني بالخطابات الرنانة والطنانة..
• كلهم حكوا عن الظلم، والفقر، والأمن، والسلام، وإطعام الشعوب بملاعق مذهّبة.
• وتمّمها زعيم أمريكا.. مش عارف كيف يجيب الفلسطينيين للمفاوضات معه..
• ولا عارف كيف يقنع أبو مازن يقبل يسلّم عليه.. لحد ما بقّ الحصوة قدام نتن ياهو.
• فجأة صار يحب دولتين للشعبين.. وفجأة حكى عن رأيه بالقضية الفلسطينية..
• هو بدو يدعس على إجر أبو مازن عشان يقبل يسلّم عليه..
• نتن ياهو كان قاعد جنبه.. نقز لما سمع هذا الكلام..
• مد إجره بدو يدعس على إجر ترامب.. أنا شفته مدّها. ونطّ عن الكرسي.
• ما قدر يطول إجر ترامب، صار يفتش على أي إجر ثانية يدعس عليها.
• لكن ترامب دعس دعسة ثانية وقال: إسرائيل بدها تدفع الثمن غالي في صفقة القرن.
• هون صار وجه نتن ياهو أحمر، أصفر، أسود، وحاص ما عرف شو يقول..
• الصحافيين قدّموا يسألوه عن ثمن الدعسة، قال أتركوني من شان الله..
• كان ملخوم، مسطول، مش عارف حاله وين.
• مش قادر يبلع ريقه، ولا يتحمّل الدعسات اللي نزلت عليه..
• وأكثر شي خايف من اللي حواليه هون، لما يرجع بدهم يدعسوه ويمعسوه..
• من الأول قلت لك، حلّها بالتي هي أحسن، ما بدك غير دعوسة.
آمال ابو فارس المربية الاديبة والشاعرة, المسؤولة عن زاوية المنتدى الثقافي. يمكنكم الاتصال بها Amlabo@walla.com او على هاتف 0549026108
