سَكْرَه

13.07.2018 מאת: وليد ايوب
سَكْرَه

يومِ الحفِلْ شْربْتْ كاس
وْما سْكِرِتْ
وِتْصَوّرِتْ لو جابوا قَنّينِه
أو حتى خلقينِه
ما يْدورِ الراسْ.
كانوا الناسِ جموعْ
مْنِ عْمارْ مخْتِلْفِهْ
شي يجمَعُنْ موضوعْ
شي تجمعُنْ إِلْفِهْ.
وْطَلَّتْ أميرهْ تْوجَّهَتْ لملْعَبي
بْزَلّةِ لْسان وحيرِهْ فَضْحَتْ مذهبي
وْسَّعْتِلا حَدّي
وِحْتَرْتْ شو بدها
وْما عْرِفْتْ شو بَدّي
قُلتِلْها ما في إشي عندي
غير إنّو صارْ راسي يْلفْ
وِجْبيني بِنَدّي
مثلٍ الشّتا بَرّه!!
إيدي طَويلهْ كِنْها
مَرّاتْ لَمسَتِ ذْراعا
وْخَصِرْها مَرّهْ
ما تْحَرّكَتْ لَبْعيد
لَزَّتْ كإنْها بقَصدْ
بَدها عيدْ هَالكرّهْ
بَرْدِ الدّني بَرّهْ؟!

إيدا على إيدي
وبالثانيهْ،
بتلاعِبِ الغُرَّهْ
الدمْ عَمْ يغْلي
وْخصِرْها يلوي
وْحَرْكَتُو حُرّهْ
قالتْ.. وَلاّ أنا ما سْمِعْتْ
قُلتلّها.. وَلاّ أنا ما قُلْتْ
إنْها لَحِنْ بِعِنْ عَ بالي
تَيْغَيّرِ حْوالي
إلْ منْ يوم ما جيتِ الدّني
مُرَّهْ
يَلّلا يا إبنِ الناسْ
قومْ تَ نُرقُصْ
عَبّيت راسي بْكاسْ
وْعَدّيت للعَشْرَهْ
حلّيتْ هَالقَبّهْ
وقلت يا ربّي
موتِ الدّني جُوّا
والموتْ مِنْ حَرّا
ثلجِ الدّني بَرّهْ؟!!

لاحَتْ بإيديها
والبَدَنْ يِتْلَوّى
تْسَبّلُوا عْنيها
أحلى نِسَا حَوّا
وِخْدودْها شِرْبوا الخَجَلْ
حتّى وَرِدْ صاروا
وْصارِ الخَصِرْ يِصرَخْ
تَنْفَكْ زُنارو
تُنقُلْ خُطاها مِثِلْ
حَجْلِهْ تْنَقْوِدْ حَبْ
مَبْسَمِ شْفافا عَسَلْ
تْمَهّلْ عليه الربْ
الليلْ ياما سَرَق
مِنْ كُحُلْ عينيها
ريقي يا عالَمْ شَرَقْ
إسْمَ اللّه حَوَاليها
تِفْتِلْ كأنها بَرِقْ
ما يِتْعَبوا جْريها
مْنِ اليوم لبُكْرَهْ
بَرْدِ الدّني بَرّه؟!!
بْتُرقُصْ مَعي؟.. بِتْطِيرْ
زَيْ نَسْماتِ البَحْرِ بالصيفْ
وِالكيفْ عَبّا الراسْ
رْموشا يا حدِّ السّيفْ
لمّا يِرِمْشُوا
يِتْخَرْبَشُوا حْواسي
ويصيرْ راسي يِفتِلُ ويُبْرُمْ
كِنّي ماخِذْ لي حَفْنهِ من "فَاْليوم"
أو شَحْنِه منْ شي دَرْوَشِه
تا فِضْيَتِ الجرّهْ
ياهْ!.. ثِقْلَتِ السّكْرهْ
وْثلْجِ الدّني بَرّه!!!

آمال ابو فارس المربية الاديبة والشاعرة, المسؤولة عن زاوية المنتدى الثقافي. يمكنكم الاتصال بها  Amlabo@walla.com او على هاتف 0549026108

 

תגובות

מומלצים