ساق الله ايام زمان

ساق الله ايام زمان
والقعده بساحة هالدار
يرحم جدي ياللي كان
على خصره لافف زنار

وعقاله والكوفيه
عمبشرب مراميه
وستي على الفرنيه
يا ما أذكى الخبزه عالنار 

مع زيت ونتفة زعتر
وكماجه عمتتحمر
يا ماحلى هاك المنظر
رح يبقى بقلبي تذكار

سمبوسك نعمل وفطير
ونقعد نوكل عالحصير
وننشل هالمي من البير
يساعدنا جدي الختيار

ساق الله عالحاكوره
لما جدي يحرثها
ويزرعها قمح وذره
وتنزل ستي تفلحها

يزرع ارضه المنكوشه
ويتغدى عالمنقوشه
والقهوة عالجاروشه
نحمص فيها ونطحنها

وامي تحلب بالعنزات
وخالي يسرح بالنعجات
وخالتي تسلق هالجبنات
عالنمليه ترفعها

واللي بالقطن ينجد
يفرفط باللحف ويفرد
وجدي عالمسند يسند
يبلش  ينفخ بالسيجار

ساق الله ايام التين
والقعده تحت التوته
وتيجي الجاره ام حسين
وتبلش تسرد حدوتي
ونجيب المي من العين
وجدي ينقل عالحمار

والسهره تحت الدالي
حتى نصاص اليالي
وصوت البابور العالي
لما تشعلل فيه النار

آمال ابو فارس المربية الاديبة والشاعرة, المسؤولة عن زاوية المنتدى الثقافي. يمكنكم الاتصال بها  Amlabo@walla.com او على هاتف 0549026108