كلمة مره مش بس كلمة محيّره

 

كلمة مره مش بس كلمة محيّره
كلمة مره بتعني أنوثة معطّرة
بتعني كلام كبير كلّو احترام 
كلّو محبة وعطف مش للمسخرة

 

الام الي تعبت ع الطّفل حتى كِبِر 
وضحّت وسهرتلو اللّيالي في صَبِر 
تيصير شب كبير ما مثلو حدا 
تركت هناها شهور وسنين  ودهِر

 

لكن حبيب القلب الله يصلحو
لما كبر ما دار الا بمطرحو
غطّى الجهل عينيه لما تخالط 
بزمره من الزّعران أخلاقه محو

 

قالوا الاخت للعار ولدت يا رفيق
والام تدعمها لتمشي في الطّريق 
أمّا المرة هي المكيدة مدبّرة 
ولّي بيأمّنلُن صبح مثل الغريق

 

صدّق غباهم راح حضّر خنجره
ليغسل العار بمكيدة دَبّروا
وكان الحقد جوّا القلب ما أكبره
وصاد الفريسة يا خساسة منظره

 

صاح قلب الام في حرقة كلام  
اختك ضلع منك لا تقتلها  حرام 
لا تدّعي انك صرت مثل البطل 
لما بتقتل روح بخسة وانتقام 

 

بعدين صار النّدم ينهش في القلب 
يبكي ع جهله كيف مصيره انقلب 
لما مشى الشيطان في دم الوريد 
الله رماه بسجن ما منو هرب 

 

هذا الدرس للي ادّعى انه رجل 
بالغدر عامل خيتو وكلّه دَجَل 
ليكون عبرة لكل مرتدّ وخسيس
يأخذ بإيدو روح عاشت ع الامل  

 

بمناسبة يوم المرأة  العالمي 

كل عام وانتن بالف خير