وَقْفي عَلَى جَنَبْ إِذَا مُمْكِنْ…!
مرحبا او صباح الخير…يعني ما في داعي تجاوبي…بس انو حبيت قول عن سبب…او اسباب الخلتني حيد عن حبك…
لا لا...اوعك تفكري كوم هالشعر الكاذب......
الي رتبو الكوافير على زوقو –كيف هو بيحب يشوفك يعني-
ولا هاللون الاصفر بلا معنى, بس انو صاحباتك هيك عملو!!!
ولا هالاظافر الطوال…..هههه
اللي الاسود عمتحسدك عليهون
الي انجق بيفرفطو لحم الغزال عن عظمو
بس ما بيخلوكي تعرفي تعملي قنينة حليب لابنك!
***الجوعان دايما!***
لا وقال شو……….
مغيرة لون عينيكي ها؟!
طيب ما عرفتيش تغيري منخارك المرفوع؟!
بلكي شوي تنزليه…؟!
بقول مثلا………..
ما في طريقة تهدي شوي من كبرت نفسك؟
………………..
واو……..لك شو هذا…وين راحو حواجبك؟!
آه خطوط؟!!!...... مبروك...تهري وما تجددي!
يعني القضاء عليهون نهائيا؟؟؟
مثل ابادة جماعية...يا سلام عليكي شو متأثرة من الواقع العربي!
مش قليلة…عكل حال في هيك معك حق...........
لانو لو ما عملتي حد, شرشبيل كان بيزعل…
بصرش قبل ما تتجوزي تكوني تحفة
وبعد العرس تتزوقي بس عالمناسبات!
هيك بتتعدي على الحقوق
جوزك لازم يتحملك اذا بتكونش سيقانك تلمع
بس عيون الغير في السهرات؟.......يعني......عيب؟؟...
عيب عيب تشوف اشي غير لائق!
خاصة انو التنورة مفتوحة والحركشة المتاحة.......
مطلوبة...او مستحبة...!!
بيناتنا يعني...ما في داعي نقولها علنا
بس اضحكي.....اضحكي في عبك.
بتفهمك انا...بتفهم هاي الغيرة الاجتماعية
مهو هيك يا ستي بتتفتح الشعوب
وبتكون لنفسها حضارة...
وانا متاكد انو انتي عمتعملي قصارى جهدك
عشان المجتمع.........صح؟!
هزي في راسك...تمام هيك
العنزات لما بيبطرو.........بيطربو
..............على فكرة مجبور قوليك...
عجبني العقد اللي على صدرك
حلو انو تعلق هناك...دليل على اهتمامك في الاوضاع الراهنة
وعدم رضاكي عن انتهاك حقوق الانسان
انا بعرف انو هالعقد صنعتو ايادي اطفال مظلومين –طبعا عارفة-
بس احساسهم بالفن ما رضي الا انهم يتقنو عملهم!!!
حتى الفيل اللي انسرق عاجو –عشان عقدك- بيتشرف انو عندك الثقافة
وبتعرفي كل شي بيدور في عالمو المسخوط...مش بس في باب الحارة
بس اكثر شي هزني فعلا...وخلاني احكيلك اسا.......
لما شفتك ناديتي لعامل النظافة عشان ياخذ كيس الوسخ
ممكن تقوليلي ليش ما قولتيلو صباح الخير اولا؟!
وليش لما ادى الواجب –رغم انو مش مجبر- ما قلتيلو يعطيك العافية؟!
وقبل باسبوع كنتي توبخيه عشنو اخرك في الشارع...
بس للشاب الي عميتسكع (في الاواعي المرتبة)...صار معك وقت ها؟!
بس اعلمي انو لقب اول في الجامعة او حتى الثاني والدكتوراة
مش معناتو وصلتي للكمال...ولا بيقول انو تنسي الاصول...
بيجوز تقولي شو دخل...بس انا بقوليك بكل تواضع...
صحيح تعلمتي وكل الاحترام...بس بتنقصك الثقافة الموجودة عند هذيك البنت يلي ضحكتي عليها مرة عشان ثيابها ممزقة! هاي بتكون خطيبتي!
